ሂጅራ ባንክ አዲስ የሞባይል መተግበሪያ አስተዋወቀ፡፡

ሂጅራ ባንክ ኦምኒ ፕላስ የተሰኘ አዲስ የሞባይል ባንኪንግ አገልግሎት ከዛሬ ነሐሴ 26/2015 ጀምሮ አገልግሎት ላይ ማዋሉን የባንኩ ፕሬዝዳንት አቶ ዳዎት ቀኖ አሳወቁ።

በየጊዜው እያደገ የመጣውን የደንበኞች ፍላጎት ለማርካት ታስቦ የተተገበረው እጅግ ዘመናዊ የሞባይል መተግበሪያ በጣም ፈጣን፣ ምቹ፣ ቀልጣፋ፣ በአምስት ቋንቋ ተዘጋጅቶ የቀረበ፣ የ ዩኤስኤስድ-የሞባይል ባንኪንግና-የኢንተርኔት ባንኪንግ አገልግሎቶችን በአንድ ፕላትፎርም ያዋሃደ በመሆኑ ለተጠቃሚው ቀላልና ምቹ እንዳደረገው በዜና መግለጫው ተገልጿል።

በዚህም መሠረት ሁሉም የሂጅራ ባንክ ደንበኞች ኦምኒ ፕላስ የተሰኘውን የሞባይል ባንኪንግ አገልግሎት ከፕሌይ ስቶር ወይንም ከአፕስቶር በማውረድ የአገልግሎቱ ተጠቃሚ መሆን እንደሚችሉ በመግለጫው ተገልጿል፡፡

ኦምኒ ፕላስን በመጠቀም ደንበኞች ያለቸውን የገንዘብ መጠን ከመቆጣጠርም ባሻገር በራሱ በሂጅራ ባንክ ውስጥ ባሉ አካውንቶች መካከል ወይም ወደ ሌሎች የፋይናንስ ተቋማት ገንዘብ ማስተላለፍ፤ ቀሪ ሂሳብዎን ማወቅና የሂሳብዎን ሪፖርት ማግኘት ፤ ከሂጅራ ባንክ ወደ ራስዎ ቴሌ ብር ገንዘብን ማስተላለፍ፤ የሂሳብን መረጃ ማውረድና ለሌሎች ማጋራት ፣የአየር ሰዓት መግዛት፣ ሂጅራ ባንክ ኢንቴግሬት ካደረገባቸው እንደ ሬይስ ማይክሮ ፋይናንስ ካሉ ተቋማት ጋር ከሚሰሩ ኤጀንቶችና ነጋደዎች ጋር የኪው.አር. አሳሸን በመጠቀም በቀላሉ ግብይት መፈጸም እንዲሁም ጥሬ ገንዘብ መቀበል    እንደሚያስችላቸው ተብራርቷል።

ሂጅራ ባንክ ሁለት ዓመት ባልሞላ ጊዜ ውስጥ ወደ ትርፍ መሸጋገሩ ይታወሳል፡፡